19 лютага, у шосты школьны дзень, навучэнцы 5-9 класаў сабраліся на турнір «Знаўцы беларускай мовы», ў якім удзельнічалі 2 каманды: “Разумнікі” і “Лінгвісты”. Мерапрыемства было накіравана на выхаванне ў навучэнцаў паважлівых адносін да беларускай мовы. Удзельнікам турніра давялося прайсці праз шматлікія выпрабаванні, каб паказаць сваё добрае валоданне роднай мовай. Першы конкурс “Размінка”, на якім у жартоўнай форме камандам былі прапанаваны лінгвістычныя заданні, паказаў уменне каманд шукаць сур’ёзнае ў смешным. Падчас другога конкурса “Перакладчыкі” навучэнцам неабходна было перакласці з рускай на беларускую мову назвы вопраткі. У трэцім конкурсе “Фразеалагізмы” камандам неабходна было з дадзеных частак скласці фразеалагізмы, якія вобразна характарызуюць з’яву ці чалавечы характар. Праверка, наколькі добра вучні ведаюць беларускі алфавіт, прайшла падчас чацвёртага конкурса “Расшыфруй прыказку”. Апошнім, пятым, конкурсам былі загадкі з вясёлай хаткі, якія вучылі дзяцей бачыць у дасціпных выказваннях утоеныя прадметы. Турнір закончыўся перамогай каманды “Разумнікі”. Віншуем пераможцаў!
19 лютага, у шосты школьны дзень, для вучняў 1 – 4 класаў прайшла пазнавальная гульня “Мова родная, цудоўная”. У пачатку мерапрыемства вучні разгадвалі красворд з ключавым слова “МОВА”. Выконваючы розныя заданні, школьнікі ўспомнілі і прадоўжылі беларускія прыказкі, растлумачылі іх сэнс. Па пачатковых радках узнавілі раней вывучаныя вершы беларускіх паэтаў і выразна іх прачыталі. Самым цікавым было заданне, дзе трэба было па малюнках распазнаць герояў беларускіх народных казак. А закончылася гульня выкананнем беларускай песні “Рэчанька”. Мерапрыемства садзейнічала выхаванню ў вучняў пачуцця патрыятызму, паважлівага стаўлення да роднай мовы.
Вучні нашай установы адукацыі прынялі ўдзел у Instagram-чэленджы “Дзень роднай мовы” ў рамках акцыі “Гавары са мной па-беларуску”. У сацыяльных сетках размешчаны відэаролікі, дзе яны чытаюць вершы на беларускай мове. 
